Intarneetiin Maali? Akkamitti Hojjeta?
Teeknooloojii |
Manzara Social |
2026-11-18 23:36:06
Intarneetiin network (hidhata) kompiitaroota, bilbiloota fi meeshaalee elektirooniksii biroo addunyaa guutuu irratti walitti hidhu dha. Kunis namoonni ergaa, suuraa, viidiyoo fi odeeffannoo biroo yeroo muraasa keessatti addunyaa gara kamiyyuu akka wal-quunnamsiisan taasisa.
Intarneetiin akkamitti hojjeta?
Yeroo bilbila kee irratti marsariitii tokko banuuf yaaltu, kaayyoon kee gara “server” jedhamutti ergama. Server jechuun kompiitara guddaa fuulota marsariitii kuusee eegu dha. Odeeffannoon kun “packet” jedhamuun kutaa xixiqqootti qoodamee, karaa kaabula, signaala bilbilaa ykn satelaayitii darbee server sanatti ga’a. Server sunis deebii isaa deebisa, kutaaleen sun walitti deebi’anii bilbila kee irratti fuula akka mul’atu ta’a.
Wantoota ijoo muraasa:
- IP address: lakkoofsa adda meeshaa tokkoon tokkoo beeksisu, akka lakkoofsa bilbilaatti.
- Domain name: maqaa salphaa (fkn. manzarasocial1.com) namni yaadachuu danda’u. Tajaajilli DNS jedhamu maqaa kana gara IP address tti hiika.
- Browser: Chrome, Firefox fi kan biroo, fuula marsariitii banee nuuf agarsiisu.
- Hosting: iddoo marsariitiin kuufamee Intarneetii irratti argamu.
Faayidaan isaa maali?
Intarneetiin barnoota, daldala, tajaajila fayyaa, bulchiinsa fi wal-quunnamtii keessatti hojii guddaa hojjata. Namni baadiyyaa jiraatu iyyuu odeeffannoo barbaadu ni argata.
Of-eeggannoo:
Intarneetii irratti nageenya eegufis barbaachisaa dha. Password jabaa fayyadami, marsariitiin “https” qabaachuu isaa mirkaneessi, link hin beekne hin cuqaasin, fi odeeffannoo dhuunfaa iddoo hundumaa hin kaa’in.
← Barruulee hunda